Engaging and Celebrating the Burmese Central Indiana ti mi puai pakhat cu tluang ten University of Indiana, Schwitzer Student Center hmunah Nov.13, nazi 6 – 8 p.m ah tuah ttheh a si. Himi puai hi UIndy le Burmese American Community Institute (BACI) timi ih bomnak ih tuah a si, ti’n UIndy website in a ngan a si.

University pawl in, hi puai thupi ding ah “Journey” tiin a hming an ret a si ti’n  Mrs. Marinna Foulkrod, UIndy ih Center for Service, Communicating leh Engagement director ih tuan mi in a rel. Hi puai hrangah hin, thil tuah ding dang dang tumpi a um a si, ti’n Foulkrod in a rel. UIndy lam le BACI pawl hnattuan tlang rero cia an si ih, Burmese thuhla hi an thulu thawn a kaih aw bik ding tiin an ruat ruangih BACI thawn hi mi puai hi an tuah tlang a si, tinFoulkrod cun a rel bet. Mipi a ratu pawl hrangah Journey thu lawng an theih a tawk lo tiin an ruat ih, curuangah puai vek in tuah an duh ih, mipi pawlkom awknak caan ttha tak ah tla a can pi an duh thu Foulkroh in a rel.

Hi puai ih a tumtah bik mi cu caa zir lamah le pakhat le pakhat pawlkom awknak ih an tthangso sinsin nak dingah a s ti’n Foulkroh in a rel ih, cu lawng si loin lai mi lawng si lo midang pawl in ram thu pawl leh ram rak ti mawi tu leh rak kilkhawtui, kan pipu nun dan a phunphun pawl an theihsinsin ih an zir bet thei nak ding ah a si, ti’n a rel bet. Kawlram rawl, laam, zuksuai pawl tla himi puai ah  hin tampi zir thei nak ding a um a si, ti’n Foulkrod in a rel.

Foulkrod in hi puai hi nuam a ti zet thu a rel ih, thil a um mi hmuah hmuah in danglam nak te an nei cio ti’n a rel. Kawl ttong, kawl ram thu le U.S an rat dan thuanthu theih le rawl tep hi a nuam a ti zet thu a sim bet. Laimi pawl ih an hruk mi lai thuam pawl tla zoh an mawi zet thu le, awnmawi le lai ram lam pawl tla zuk ih zoh an nuam thu Foulkrod in a rel betl. Thil tampi lakih thil lungawi ter tu bik pakhat cu, mipi hmunkhat ih nuamzet ti ih ra ih, an um tlang mi a si, ti’n Foulkrod in  a rel.

“Mi zaten, nangmah thawn danglam khal si seh la, khuitawk ih sin an raa khal le, an hnen ih sin thiltampi nan zir thei a si. Mi pawl tla caan pek in pawlkom nak tivek ah nan tel thei ding mi ka lo duhsak,” ti’n Foulkrod in a rel.

BACI lam group ih a tel thu le Engaging and Celebrating the Burmese Central Indiana puai ih bamboo dance ih a tel thu cu phun hleihnih kai lai rero tu Zing Hlei Vang in a sim. Bamboo dance ah hi minun pa riat an si ih a lam tu hi college tlawngta, PMHS tlawngta le SHS tlawngta an si thu tla a sim bet. Hi lam hi zarhkhat pumhlum sung lawng an rak zir ih cumi sungah nikhat ahhin nazi pa thum sung lawng an zir ziangahtile hi lam hi Sister Indy Festival ah an rak lam zo ih an thiam cia mi a si ruangah a si ti’n Vang in a sim.

Vang ih a sim dan ahcun, hi puai an tuahnak bik cu Uindy pawl in Burmese thuhla le pipu daan, nunphung pawl theih an duh ruangah a si. Cumiruangah lai lam, lam dingah in sawm ti’n a rel. Ram dang mi pawl lai lam zirh phah ih lai nunphung pawl sim hi nuam a ti zet ti’n Vang in a rel. Hi puai ihthil dang a tel mi pawl cu SHS ihsin tlawngta pakhat hlasaknak a nei, rawl tep theih mi, le thusim tawi pawl tla an si.

Vang in BACI hi 2014 summer Researh project tuah lai hrawngah a rak lut thu a sim. Hi project tuah dingah group in an tthen ih Vang ih group ih an tuah ding mi cu Identifying Professional in the U.S. timi a si. Hi an tuah mi thu cu Burmese le Chin mipi sung ihsin mi thiam hleice cuang pawl an hawl thu a si. BACI ih luhnak in tampi in bawm ziangahtile after school ah bomnak um ih nazi 6 p.m – 8 p.m tiang. Cu betah fehlam le tlunlam ah anmah in in sawm theu a si ti’n a sim.

“ Tui kum ih a lut lo pawl , hmai kum ah nan lut ding ka lo duhsak abikin phun hleihnih kai ding pawl ziangahtile (BACI) a lo bawm tuk ding,” ti’n Vang in a sim.

Phun hleikhat a kai rero laitu Ca Men Tial cu BACI ih a tel mi a si ih September 2014 ihsin rak tel thok mi a si thu cu a sim. BACI a lut hnu ih thil pakhat an tuah mi cu university pawl ah an feh mi a si. Tial in hi cultural show hi nuam a ti zet. Bamboo dance lam ah a tel tu si lohmansehla  an lam lai zohnuam a ti zet thu tla a sim.

“BACI luh ih hlawknak cu kan homework, cangan, le SAT hrangah in bawm,” ti’n Tial in a si,. “Ka tlawng ca hrangah tampi in bawm.”