SHS in ENL tlawngta nauhak tampi an nei ih tlawng in ENL nauhak pawl an hmailam nun hrang ah an buai pi zet a si. ENL tlawngta nauhak pawl in zirhtu saya pawl hnen ihsin bomnak tampi an nei ih, cu mi men si loin phun hleihnih kai rero pawl tu hrangah a hlei in an ngah a si. Zirhtu saya pawl in an caan tampi pe in program pawl ENL tlawngta nauhak hrangah an tuah sak asi  ti’n ENL saya, Mrs. Amy Peddie in a rel.

Peddie in hi program a tuah nak san bik cu amah tlawng a rak kai lai ih a nu le pa in college hrang a ca an zoh sak sal ttheu vekin ENL tlawngta nu le pawl in an fa le pawl college hrang ih ca an ngan mi pawl an zoh le rem sak thei lo ti a theih ruang bikah a si.

Fall tlawng colh ih zarh hnih nak, tlwngkai nikhat le nihnih, sun zinglam nazi pa kua ihsin zanlam nazi pa li tiang Scholarship Essay Writing Workshop cu a tuah a si ti’n Peddie in a rel. Hi ni hnih program hi Lilly Scholarship, Gates Millenium Scholarships le Asian Pacific Islander American Scholarship Fund (APIASF) pawl hrang essay ngannak a si, ti’n Peddie in a sim. Peddie ih rel dan ah cun hi program hi senior pawl hrang lawng a si. Hi program a tuahnak san cu Scholarship pek nak caan hi January thla thok ih a cem ding ruah ah a si ti’n Peddie in a rel.

“Hi program hi ka veikhat tuahnak a si ih, tu lawng si lo in hmailam khalah tuah bet ding in ka tum vivo,” tiin Peddie in a sim.

Zarhkhat ah vei hnih vei thum lai senior pawl college ca pawl an ngan mi bawm in a taang ttheu ti’n Peddie in a rel. Peddie ih reldan a silen September thla thok hrawng, tlawngkai ni thum zanlam nazi pa hnih ihsin pa li tiang, tlawngkai ni nga ni zanlam nazi pa hnih le khuai ihsin nazi pa li tiang tlawngah a taang ttheu a si. Hmansehla scholarship ca pek ding ni a naih tiklen tlawngkai nihnih ni ahtla a taang ding ti’n a rel bet. Caan a mal deuh ding le can tlawngta pawl in an ttheh man lo ding a phan ruangah tuan deuh in an ca ngan an thok ding a duhsak ruangah fall tlawngpit caan ih program a tuahnak san tla a si.

Newcomer zirhtu Mrs. Marsha Manning cu January 2009 ih Newcommer program tuahtu a si. ENL program ih thuneitubik a si hlanah SHS le PMHS ah ca a rak zirh dah ih 1997 ah district ihsin ENL zirhtu hmaisabik a rak si. Newcomer program cu Perry Township Education Center (PTEC) ihsin rak thok mi a si ti’n Manning in a rel. SHS ah tlawngta cazirh lawng si lo in ttuanvo tampi dangtla a nei ti’n a rel. Manning in a ttuanvo dang a neih mi pawl cu tlawngta nauhak pawl test, zirhtu saya le sayamah pawl thawn thuhla sim le rel tlan le zirhtu pawl thazaang pek pawl an si.

Newcomer program ih a tumtah mi bik cu mirang ca tthanso le biakawknak ih an hmanthiam ding, ca ngan, casiar le hna ih theihthiam sinsin theinak ding pawl an si. Newcomer tlawngta tampi cun an ca tuah ttul mi pawl an tuah thei lo caan tampi a um ziangahtile ttong an theih lo tikah ziang an tuah ttel ti an thei lo ti’n Manninng in a rel. Hmansehla hi program in tampi a bawm tiah a sim.

“Himi level zirh hi nuam ka ti zet. Tlawngta pawl in mirang ca zir duhnak ngaingai thawn  ka khan sung an rung lut ziangahtile United States in an hrangah caan ttha a pek ti le U.S. tlawngah a cang thei lo ti a um lo ti an thei,” ti’n Manning in a sim.

Fall tlawngpit sungih tlawngta dang thawn Scholarship Essay Writing Workshop rak kai nakin tampi in bawm tiin senior Nancy Hlawntin Sui in a rel. Hi program in college kai nak ding hrang le cangan dan pawlah in bawm zet ti’n Sui in a rel. Hi program a feh lawng si lo in Peddie thawn after school ah a tang ringring thu tla a rel bet.

Sui ih sim dan vek a silen, college hrang ih ca ngan hi a harzet ziangahtile kan ca a thiang a ttul ih a siar tu pawl ih duh ding ih kan ngan a ttul. Cumi lawngah an tlawngah kai ding in pom ding ih scholarship tla kan ngah ding a si, ti’n Sui in a ti. Phunhleihnih kai hi zumdan ding a har ziangahtile tunai te high school ka thok vekin ka thei hmansehla tu phunhleihnih ka thleng ti theih in ziangtluk ih thlawsuahnak ka ngah timi in thei ter, ti’n Sui in a ti.

“ Phunhleihnih kai timi cu upa tling si nak ding a naih vivo ih hi leitlun thil cang mi mahten kan pahtlang ding kan man ding nak a kim caan a si. Curuangah kan ti thei tawk in kan zuam a  si len kan hlawhtling ding ih kan tumtahnak kan thleng ngah ding,” ti’n Sui in a rel.

Scholarship Essay Writing Workshop program ka kai mi in tampi college kainak ding le scholarship hrang essay ngan mi pawl hlawknak ka nei, ti’n phun hleihnih kai rero lai tu Doris Dong in a rel. Dong in, scholarship hrang essay ngan hi a hartuk lo asinan a buaithlakzet ziangahtie scholarships essay pawl hi college hrang essay thawn an bangawk deuh. Dong hrangahcun phun hleihnih kai hi a nuam a ti hmansehla thiltampi in hnaihnoktu an um, cumi pawl ih pakhat cu AP class pawl an si.

“Hi program in ka zummi hnak in tam scholarship dangdang kan shiauh thei mi hrang in bawm thei ih essay kan ngan mi tla tampi in bawm,” ti’n Dong in a sim.