SHS i a ummi saya le sayama te pawl nih siangngakchia a khat cu an mah tein ca tuah loin, midang ca an fir piak hna i an mah ta bantukin an caku ah an ttial hna an ti. Mah siangngakchia chung cun EL ngakchia zong an i tel ve.

English, speech le EL a chimtu saya Josh Brown nih cun mah thil cu EL a ngei mi he EL a ngei lo mi he, an dihlakin an tuah dih ko. Kum khat chung ca a chimh ahhin EL a ngei lomi hna sin in midang ca fir mi tampi a hmuh nain a tu kum cu EL a ngei mi an ca zongah a hmuh mi a tam ve, tiah Brown nih ati.

“Siangngakchia nih hin zei ruangah dah midang ca an fir piak hna ti hi kaa fiang lo,” Brown nih ati. “Siangngakchia nih an ka chimh mi cu an mah an ca ttial mi kha tha seh ti an duh caah midang ca an fir piak hna i an mah an caku ah an ttial tiah an ka chimh.”

Siangngakchia nih mi ca an fir mi hi saya le sayama te nih an hngal lo tiin an ruat ko lai nain an theih dih ko tiin Brown nih a ti. An mah tein ca an tuah thiam lo ahcun saya le sayama te an um ko i an hal khawh ko hna nain mah cu tuah loin computer ah le an hawi le sin in ca an fir mi hi a tha lo tiin Brown nih a chim.

Tang hra a si mi Mang Biak Lian nih siangngakchia nih  a tha lo ti an theih ko buin an tuah peng ko ati, saya le sayama te zong bawmhnak hal loin mi ta an zoh piak hna i an caku ah an ttial.

“Mah kan tuah mi hi a tha lo ti cun an theih ko nain an mah tein an ca tuah an huam lo caah mi ta an fir piak hna,” tiah Lian nih ati.

Mah mi dang ca fir piak a that lonak kong hi cu a khan chung ahcun a cawnpiak peng ko hna tiin Brown nih a chim. Tuah hla uh zong a ti peng ko hna nain an ngei lo tiin Brown nih a chim tthan. Midang an ca tuah mi a duh lo ih siangngakchia an mah tein ca an ttial mi kha a hmu duh tiah Brown nih a siangngakchia pawl a chimh peng hna.

“Mah mi ta an fir piak lengmang mi nih hin an sianginn kai nakah sunghnak an hmuh lai. Keimah ka khan chungah cun mah hi thil hi tuah hna seh law an sung lai, tiin Brown nih a chim. “Nain college ahcun sianginn in an chuah hna lai tiah ati. Mah ruangah cun mah hi thil hi tuah lo a thabik.”