Minung tampi cu ram tha le hmunhma tha deuh kawl ah ramken kipah an vakvai tawn. Himnak le sikhawh deuhnak kawlah Far Tha Hlei(tang hleihnih) le an innchungkhar zong Malaysia ah an kal ve. A nu, a pa le a naunu Zing Tha Hnem (tang hra) hna hi Malay an phan hmasa i, a tta Ni Kung (tang hleihnih) le Hlei cu hnu deuh ah an kal.

An kal caan aa khat nain an puai-sa a dan caah, mawttawka dangdang in an kal. Hlei citmi mawttaw cu Thailand palik nih an tleih i minung a citmi thawng an thlak hna tiah Kung nih a chim. A nu nih cun kan fanu a tlau tiah an puai-sa sinah a chimh i kawlpiak dingah an hal hna nain an hmu kho hlei lo.

“Thawngin chungah cun ka nu le te sinah kal ka duh tiin ka ttap i, a nithum nakah cun Palik pa nih na nu le sinah kan kal pi lai a ka ti nain a lih lawng te a si. Ngakttah Runinn tu ah a ka chiah,” tiah Hlei nih a chim.

Thailand ram ahcun sianginn a kai i holh theihlo le thiamlo ruangah velh le nautat a tong peng, tiin Hlei nih ati. Kawlram ah ABC zong ka rak cawng cang caah ka hawi le lakah mirang caa ka thiam deuh caah an ka hnahchuah i an ka hrem cun ka sam zong an ka hnuh piak i a ttap tawn, tiin Hlei nih a chim.

Ngakttah runinn nih cauk pathum an cawkpiak mi cu sianginn hngakchia kai timi nih an thlehpiak dih i a cafung zong an fir piak chih. An zual chin sual lai ti phanah a zohkhenhtu le sin zongah a rak chim ngamlo tiah Hlei nih ati fawn.

Hlei nih cun sianginn kai i mi nih velh lengmang nak in ngakttah runinn a zohkhenhtu sinah rianttuan a hal i ttamhnak thil zuarnak chawdawr ah rian a ttuan. Thailand holh zong a cawng pah i ttha tein a thiam hnu ah Lai holh tu kha a philh pah tiin Hlei nih a ti. Voikhat cu a chungkhar hmuh duh ah ngakttah runinn in tlik a tim nain an tlaih menh. Fungtuk in dantat a si loah minung 700 rawl ei nak kheng  ttawl piak asi tiah Hlei nih a chim.

Hlei nih harnak tampi tong ko hmanhsehlaw kumhnih hnu ah a caah cernu a ceu tthan. A ruang cu United Nation High Commissioner for Refugee (UNHCR) agent thawng in a chungkhar le nih a umnak an hlat khawh. A si nain Lai holh cu a rak philh manh cang caah a chungkhar he an i chonh tikah holhlet an hau.

A hnu cem ah UNHCR bomhnak in chungkhar tling tein U.S ramah ra tti dingin caan ttha an co ve.

“Ka fanu ton dingah kan kal ti an kan chim lo nain Thailand airport kan phan bak ah ka fanu te ka hmuh hrim lai tiah ka lung chungah theihnak ka ngei,” tiah Hlei a nu Hlawn Men nih a chim.

Kum thum chung an i hmu tilo mi an si caah khat le khat an i thei kho lo. Hlei nih a min ttialnak ca i tlaih in amah tein adiarmi kha  anu nihcun a hei fuh i, an fanu a si le silo an hal. An i ton taktak tik ahcun an i kuh, an țap, an au i, lunglawmh tukah mitthli a luang.

“Van lawng cit ding ka ttihtuk nain, zeitikah vanlawng cung kan phan tile, zeitikah dah USA  kan phan ti hmanh ka thei manh tilo. Kum saupi a tlau cangmi kan fanu Pathian nih a kan hmuh ter tthan caah lung lawmh hnangam tein ka ra kho. Pathian nih ka caah a tha cem khua a ka khan piak mi si” tiin Men nih a chim.

Kawl ram um lio ah saupi um ti lo caah Hlei a nau Hnem nih kum sau ngai a unu he an i tong lo lio ah a ngeih ngai tiin a chim. Hlei cu Hnem i a farnu ngeihchun a si caah a dawt zong a dawt deuh le an i tonh than hi a lung a lawmh tuk tiin a chim than.

“Malay in kan rat tik ah chung kan tling ti lo nain, ka u he kan i tong ih chhungkhar tling te in kan i tong ih ka nuam tuk,” tiah Hnem nih a chim.

Hlei chu a chung le nih a hlan nakin an daw deuh. Men nih cun Hlei hi an sinah um zungzal seh ti a duh na in a tu cu va a ngeihtak caah a si avang ngai tiah a ti.