EL siangngakchia hna cu kum saupi LAS LINKS in camipuai an phi tawn nain kan hnu kum ah LAS LINKS cu ACCESS timi ah an thlen. Mah ti an thlen hnu in siangngakchia an hmak a thatter deuh tiin EL saya le sayamah te nih an chim.

A tu kum ACCESS camipuai cu kan hnu kum nakin aa dang deuh. EL sayamah asi mi Amy Peddie nih a tu kum cu caku in si loin, computer ah camipuai cu an tuah lai tiah a chim. Cu ruangah cun siangngakchia nih an ngeih mi an chromebook ah camipuai cu an phi lai nain computer ah an tuah mi hi a thathnemnak a um ko.

“Computer ah an tuah mi a thathnemnak cu saya le sayamah te nih siangngakchia an hmak a hmuh mi a fawi deuh lai,” tiah Peddie ni ati. “WIDA ACESS Consertium timi ACCESS camipua a petu hna nih mah camipuai nih hin siangngakchia mirang holh an holh mi an thiam deuh maw timi a langhter deuh lai tiah an ti.”

A tu kum cu computer nih khan an aw a khumh hna lai nain mi nih maw hmak an pek hna lai computer nih timi cu ka thei lo tiah Peddie nih a chim. Kum dang i mah camipuai ah hmak a petu hna nih a tu kum cu hmak an pe hna lai lo ti cu tu ka theih tiah Peddie nih a chim fawn.

Cu ruangah cun, a tu kum cu siangngakchia hna nih mah camipuai phit ding hi a tlawmte an tih pah ziah tiah cun a luan ciami kum ah cun saya le sayamah te nih siangngakchia cu hmak cu an pek hna i WIDA ACCESS zungah an va kalpi i an mah nih an pek hna, siangngakchia camipuai an phit mi cu.

EL siangngakchia dihlak chungin, mah camipuai tuah hi a zenh deuhmi cu tanghleihnih a kai liomi Pan Noi asi. A ruang cu mah camipuai hi EL saya le sayamah te he an tuah tawn nain a tu cu saya le sayamah te he tuah ti loin computer ah an tuah cang lai.

“Mah camipuai phit hi a tu kum cu ka zenh ngai. A ruang cu saya le sayamah te he kan phi lai lo,” tiah Noi nih ati. “EL saya le sayamah te nih mirang holh kan holh mi an hngalhthiam deuh. Caan zong tam deuh an kan pek. A phi ruah caan zong an kan pek chih. Mah ruangah hin a tu kum camipuai hi a har deuh lai, caan saupi a phi ruah caan le chim caan kan ngei lai lo i.”

Peddie nih mah camipuai nih hin kum khat chungah EL siangngakchianih mirang holh an i chap deuh maw timi a fianter lai tiah a chim. Cun mirang ca rel siseh, ca tial siseh, mirang holh holh zongah siseh, an thiam deuh maw timi a langhter lai.

Peddi nih kan duh mi cu EL siangngakchia hna nih one level si lo le two level hi kai hna seh law ti kan duh tiah a chim. Level four le five ah a um mi hna hi level kai hna seh law ti cu kan duh pi bik hna. A ruang cu mah hi kan sianginn nih hmak kan hmuhnak asi ve tiah Peddie nih a chim. Kan sianginn lawng si loin, Perry Township i a ummi sianginn paoh nih hmak kan hmuhnak asi caah siangngakchia hna nih mah camipuai hi tha tein an pit a hau.

“Mah camipuai hi a har ngai ko nain tha tein an i zuam ah cun an tuah khawh ko lai. Mah camipuai hi a herh tuk mi asi caah an i zuam taktak a hau. A ruang cu mah nih hin EL khaan chungah zei level ah dah an um timi a kan theihter lai i zei khaan ah dah kan chiah hna lai timi zong a kan theihter lai ,” tiah Peddie nih ati.