“Tulai cu hngak rero caan asi ko,” SHS EL syama Amy Peddie nih a hmang ring ring mi ttongkam te si. Kum 2016 ih phun hleihnih kai pawl an ttheh ding  caan a naih sin sin vekin,  tlawngta pawl tla tlawng ttheh hnu ih thil an tuah ding pawl an ruat thlang. Tlawngta hrek khat cu hnattuan lut cih an tum nan hrek khat cu phunsang tlawng kai dingin an tim an tuah rero a si. Curuangah phun hleihnih tlawngta pawl hrangah cu phunsang tlawng kainak dingin ziang vekin tim tuah ding timi hi theih a ttul zet  mi asi.

Emily Sung, 2015 ih phun hleihnih rak theh zomi, tu ah Indiana University Bloomington (IUB) ah pursum leilawn thuhla (Business) a zir rero lai asi. Sung hi 2015 ah Lilly Endowment Scholarship a rak hmu ih, khami scholarship nih kum li sung a cusin (tuition) man a pek sak theh ding asi. SHS ih EL saya HL, sayama Peddie, leh Mirang Ca sayama Breeden te cu a duhbik mi saya/sayama pawl ansi ih, anmah ruangah phun hleihnih zirsuak in mah leh mah zumnak a neih phah thu Sung nih a sim.

“A voi khat nak tlawng ka ra lai te kha ka mang lai. Ka thin arak phang ih himi hmun hi ka umnak ding hmun a si lo vek in ka rak ruat. Asinan, anmah (saya/sayama) nih ka hrangih a harsami tlawng ca pawl in bawm. Annih cu ka nun ih inbawmtu pawl ansi bakah ka (tuah) duh mi ziang khal hi, ka tuah suak thei, ka ngah thei timi in theih ter ring ring tu pawl asi,” tin Sung nih asim.

Phunsang tlawng a kai hlan, phun hleihnih a kai lai ih a timtuah awk dan cu a harsa mi um lo. “Thil ziangkim ka tuah hlanah Pathian hnenah thla ka cam hmaisa ringring,” tin Sung nih a ti. Phun hleihnih a kai lai ah scholarship malte cu a dil. Cule, phunsang tlawng (college) panga ah kainak a dil ih, a hrampi ah cu, an tlawng nih a zirh/pek thei mi pawl a zingzoi. Sung nih sim dan ah cu, IUB ah tlawngkai ding in a fiang awk ziangah ti le IUB hi Business zirnak hrangah tlawng tha rak si ruang ah asi. A saduh thahmi cu thil a tuahmi hlasak / sumtuah nak lamah hlawhtlinnak hmuh hi asi.

SHS ah tlawng a kai lai ah Key Club, National Honor Society, Green Earth Society, Coffee House leh SHS Journalism cangvaihnak lamah a tel theu. Hivek cangvaihnak lamih a tel ruangah tlawngta nakhak hrek khat thawn hnattuan tlang theinak, cule tlawngta thar thawn tonawk nak caan a ngah. Atu ah cun, phunsang tlawng a kainak IUB ih Myanmar Student Association Clubs ah a telve asi.

Sung nih a tong mi thil lakih tlawngta dang, a hleice in phun hleihnih kai tlawngta, pawl hrangah ruahnak a pek duh mi cu phunsang tlawng hrek khat ah va feh/ tlawng, cule mah duh mi tlawng kha tuan ten hril cia, scholarship ummi hmuah hmuah dil, it men men lo ih ttuan sauk tul thu hi asi.

Phunsang tlawng kumkhat nak kaitu asi vekin phunsang tlawng a kai thok tu ding pawl hrangah cu “tlawng kai pekte ah mah le tlawngin an sak dan leh tlawng umdan pawl zingzoi, ruahnakpetu pawl (advisors) thawn kumkhat ah a mal bik voi hnih tal tongawknak neih, ca zirhtu (professors) pawl thawn hmuh ih theihternak neih, mah le zirmi thawn pehper mi meeting leh conference tivek kai, cule caan tha ten hmang thiam tul ih, netabik ah cu, ca longlong zoh loin, thin nuamnak tla hawl phah phah ding asi,” tin Sung nih a sim.

Phunsang tlawng hi a hlanih a ruah mi hnakin a nuam sawn thu tla Sung nih a sim.

“A nuam, cule a harsa ve tho tho. Na caan hi ziangtin na hmang ding timi na thei ih nitin hi ni netabik si vekin na zuam le cu a awl tuk. Nan, na caan na  fir ih, neta le tuah leh ding tiin hmailam ah thawn rero le cu a harsa asi,” tin Sung nih a ti.