Cheukhat caah cun hawhra ti mi hi an thei ballo. Kawlram le U.S. ram cu an umnak aa hlat tuk i aa dan tuk caah kawlram lei i siangngakchia nih ton bal lo mi le hmuh bal lo mi thil tampi an um, hawhra cu hi thil lakah hin aa tel mi asi.

Tangkua kai liomi Nei Cing le Doi Cer caah cun a tu kum hi a voikhatnak khuasik caan an ton hmasa bik asi. Kawlram zongah a kih caan a um ko nain a tu lio kih tluk in a si lo tiah a ti. Hi bantukin van leiin hawhra a tlami hna nih an lung a thar ter. Hi vawleicung an hmuh ninh zong a dan ter. A ruang cu hawhra hi a um lai ti hi an ruat bal lo.

Cing caah cun nikhua hi a ruahnak bantukin asi ko. Mi nih an chimnak in a theih ve nain a ruah lomi pakhat cu hi tluk in a kik lai ti hi asi. Amah nih cun annih lei khuasih bantukin a si lai tiah a ruah.

Cer cu Cing he aa dangh. Amah cu T.V. a zoh nak in hawhra kong hi a theih. Korea baisikup hna a zohnak ah hawhra hmunram an langhter mi hna nih hawhra a um timi hi a hngalhter. TV chung i a hmuh tikah, a tak tak ah hmuh a duh tuk. Zeitluk in dah a nuamh lai hawhra a tlaknak hmun ah um cu tiin a ruah.

“A lenglei ah kal in i chawh kha ka ngeih bik,” tiah Cer nih a chim. “Ka lamh cianak zoh than in ka keneh hmuh than hi zeitluk in dah a nuamh lai ti ka ruah ah hin, ka thinlung a nuamhter tuk .”

A ton tak tak tikah cun, a duh ti lo. A voikhatnak lawng a caah a sunglawi bik. A lenglei zongah a um huam ti lo, a caah ah khua a sik tuk. A lum lonak hmun ah saupi um aa ziak rih lo caah.

Tangkua kai liomi Khen Thang cu hi hawhra nih cun a lungsiter lo. A ruang cu thil tuah a duhmi a donh ruangah.

“Malaysia le kan ram ah um ka duh deuh ziah ti cun ka duh poah in a lenglei ka chuak kho, ” tiah Thang nih a chim. “Hika ahhin cun, inn chung ah um hau ko khuasik caan ah cun.”

Thang nih cun thal chuak zawk seh tiin a duh. A lenglei ah lentecelh le a duh mi tuah a duh.