U.S. ram ah a ummi Laimi paoh nih an min pek khawh a si. Chin Community of Indiana (CCI) nih tu kum cu “Chin America’s Got Talent” ti mi program thar an tuah.

Mah i zuamnak tuaktantu, Rosie Par, cu aa nuam tuk. D.C. in a tthial khawh bak in an sawm i aa lawm tuk. Mah bantuk zuamnak hi a lenglei in thazang a pek tuk asinain aa tel ballo. Mah an tuah mi a ruang hi mino hna an pahrang langhternak caah a si ti in a chim.

CCI nih cun lawmhternak leiah thazang an pek tuk lo tiin Par nih a ruah. Cu ruang ah cun, mah an thawk mi hi a duh i aa lawm.

“Asian nu le pa nih cun an fa le hi hlasaknak lei ah le lamnak ti pawl ah thazaang an pe tuk hna lo. Annih nih cun sibawi le engineer lei khi an duh piak hna,” tiah Par nih a chim. “Kei ka ruahnak in cun, a zuammi hna nih hin tangka an ngah kho lai i rian caah an ser khawh lai. Thazang kan pek a hau.”

Hi program chungah aa tel ve mi cu SHS a kai liomi tanghleikhat Cung Lian a si. Lian cu hi program ahhin hlasak aa zuam ve. Asinain a tla cang. A ngaihchia lo ziahtiahcun a nuamnak a si i biakhiahtertu pawl hna zong a phung ningin tein an tuah ko tiah a chim.

“Pakhat a kai khawhnak caah cun pakhat a tumh a hau,” tiah Lian nih a chim.

Hi program an thawk mi hi a thahnemtuk i hmailei caah a tha tiin a ruah.

Chin America’s Got Talent an tuah mi hi i fonhnak le i komhnak ruang a si i mi tam pi Chin National Day ah ra hna seh tiin an duh ruangah an tuah hnawh chan mi a si. A thiambik mi panga nih an pahrang an langhter lai caah khi ni ah khin.

Mi sawmthum nih min pek khawh a si nain 29 lawng nih an pek. Minung aa tluk tein an cheu hna i zan thum chungah minung hleihnih an thim than hna. Hi minung hleihnih ah hin an thim than hna lai i a dongnak ah panga an tang lai i Chin National Day ah an pahrang cio langhter si lai.

An pahrang pawl cu hlasaknak le lamnak pawl an si.

Biakhiahtertu panga an um. Pathum cu hlasak thiamve mi an si i laksawng zong tampi an hmuh cang. Pakhat nih cun a tha mi pahrang a hmuh khawh. American Idol le X Factor le America’s Got Talent aa tel mi Simon Cowell bantukin.

Mi hmuhsaknak caah ninga ni zaan in zarhpi zaan tiang live in an langter, Feb. 18 hlan tiang. A thlawmbik thong khat nih an zoh mi asi. Facebook le Chin TV, le Chin International TV ah zoh khawh a si. TV zoh huam lo mi cu Chin Center ah kal in zoh khawh asi. Man pek hau loin.

An i zuamnak le caan an pek nak caah a pakhatnak cu tangka thongkhat le zanga a ngah lai i, a pahninak cu thongkhat a ngah lai i a pathum nak cu zanga a ngah lai.

Lian lawng si loin tanghleikhat kailio mi Bawi Thang zong a zuam ve i amah cu a kai. A mah zong nih caan tha a si Laimi pawl caah tiah a ti. A pahrang (rap) a langhter khawh caah aa lawmtuk.

“CCI lo cun, mi nih an ka thei tuk lai lo,” tiah Thang nih a chim. “A tu hi cu, mi nih an ka thei deuh.”

Thang nih cun pakhatnak hmuhkhonak caah a zuam lai. Asinain, a pahninak le a pathmunak zong a hmuh khawh ahcun aa lawm ve ko lai.