ThPassing period ih science hallway feh ah saya/sayamah pawl tlawngta an hmuak lai hmuh theih a si. Asinain, tuikum ihsin saya/sayamah pawl lakah sayama thar in tlawngta pawl a hmuak thok ve.

July 24 thok in Miriam Mawi cu SHS ah science sayama a ttuan thok. Perry Township ah Laimi sayama hmaisabik a si; cumi asinak ah a lungawi ih a hgakhlap tla a hngakhlap zet. Asinain, a awlsam ve lo.

“A pakhatnak Laimi sayama ka si ruangah phurrit tampi ka nei,” Mawi in a ti.
Phurritnak a neih sannak cu Southport ih nunphung tthang deuhdeuh mi amah in a aiawh ruangah a si.

SHS tlawngta ah Laimi pawl hi 20% an si, asinain tlawng saya/sayama ttuantu tampi an um hrih lo. Himi ruangah, Mawi in SHS ah Laimi saya/sayamah pawl tampi um ding a thupi tiah a ruat.

“Southport hi miphun dang tampi kainak asi,” Mawi in ati, “Khami ruangah tu cu hnattuan tu pawl tla miphun dangdang le hnam dangdang si ding ah thupi.”

A department chair le biology sayama ve, Amanda Schnepp, in Sayamah Mawi asinak cu thupitak in a ruat ve. Schnepp in SHS tlawngta pawl palai an neih dinghi thupitak in ret dingah a duh.

“Kan tlawng le kan khawsa tlang hi miphun tampi an um, cu ruangah kan tlawngta pawl hi anmah ih hmuihmel kengtu saya/sayamah an neih ding hi a thupi tiah ka ruat,” Schnepp in a ti.

Mawi in shelter classes pawl tla a zirh, shelter classes cu mirang ttong thiam deuh lo pawl hrang ih khan an tuah mi a si. Himi khan in, a tlawngta pawl kha an theih thiam thei dingin zirh a duh.

“Science hi mirang ttong thiam pawl hrang hman ah a har mi ca a si, mirang ttong thiam lo pawl hrang ah cun a har cuang,” tiah a ti, “ELL tlawngta ka rak si dah thu le tu sayama ka ttuan thei thu sim sehla tu ELL tlawngta pawl tha ka pe thei ding ka zum. Cule Lai ttong tla ka thiam ruangah ka simfiang thei deuh ding.”

Tlawng hotu Brain Knight in himi tlawngta pawl hi saya/sayamah dang pawl ih an bawm theilo mi ah Mawi in ah bawm thei ding tiah a zum.

“Ka zumnak ah, ttong a let theih nak, a zirh theinak le tha a pek thei nak pawl hi a khan ih ummi tlawngta pawl hrangah thil tthahnemtak a si ding,” tiah a ti.

Laimi tlawngta in tla Mawi an sayamah asi a tthathnemtak ding tiah an zum; ziangahtile, an ttong a thiam ve ih cule Laimi asi ruangah an theithiam aw awl.

“Kei ka hrangah a sunglawi, ziangahtile Laimi sayamah ka nei dah lo,” tiah Freshman Cung Par in a ti, “Cule, Lai ttong in kan biak ruangah biak a awl sawn.”

Laimi sayamah neih hi thil thupi a si ti ah a zum ve. A thupi ti ih a zumnak cu mirang ttong thiam lo pawl in Lai ttong in thu an sut thei ding ruangah a si.

Asinain, Mawi hi Laimi asi ruangah SHS ih hire mi asilo.
“Kan tlawng ah tlawngta-sayamah a rung ttuan ih cumi ihsin kan theihmi a si,” Knight in a ti, “Sayamah ttha a si tiah ka zum ruangih ka hire mi asi.”

Phunsang tlawng a kai lai ah, Mawi in sayama a ttuan tum lo lawk. Asinain, nauhak pawl Sunday School ih a zirh hnu ah a ruahnak a thleng sal.

“Ahmaisa ah sayamah ka ttuan paih lem lo,” Mawi in a ti. “ Asinain, Sunday School sayama ka ttuan hnu ah mi zirhtu si a nuam tak ka ti.”

Mawi cu East Carolina University ah phunsang tlawng a kai, cumi tlawng ihsin biology degree a ngah. Cule, University of Indianapolis ihsin Master of Arts in Education tdegree timi a ngah.

Laimi hmaisabik a sinak ihsin phurrit a nei nan, a hrang ah cun a tlawnta pawl kha a khan ih um nuam an ti ding hi a thupi sawn.

“Ka hrangah cun ka tlawngta pawl an um nuam ding hi ka duhbik,” tiah a ti, “Ca tuah sual an ttih lo ding tla ka duh ih, ka khan ih an um sung cu thil thar an zir ringring ding hi a thupit bik ti ka zum.”