Phun hleikhat kaimi Keely Sullivan a hmuh mi a mawi a ti tuk ruangah a mit a tthep thei lo. Spain ram ih a laibik mi khua Toledo ah a tlawng, in Europe ah tlawng hmin thawn nuamnak in khual an tlawng. A mawitak mi tlang le minung ttha pawl a ton ruangah Toledo a hngilh thei dahlo ding tiah a ti.

Ramdang ih tlawng hi SHS tlawngta pawl an tuah theimi a si. SHS saya/sayama pawl in kumtin deuh thaw an khuakhang mi a si.

Sullivan ih khual tlawnnak ah mi ttha le thil mawitak pawl a hmuhmi lawng a mang lo. Miphun dang le minung dang pawl a tonmi pawl tla a hngilh dah lo ding ziangahtile a thu ruah daan an kau ter.

“Miphun dangdang le mi an nun daan ka hmu ih cule khua dang pahnih ih thuanthu ka zir thei,” Sullivan in a ti.

Phunhra kaimi Isabella Smith tla tlawng thawn khual a tlawng ve ih, a lungkim pi. Smith le Sullivan an feh hmun a bang aw.

“Ramdang ih minung pawl ziangtin saw an nun daan ti ka hmu,” Smith in a ti. “America le Europe ram pawl an dang awk daan ka theih thei ngah.”

Thil dang tlawngta pawl ih an ngah thei mi cu thil thar duhnak le hmuh le ton mi thar asi. Phun hleihni kaitu Dane Latinovich in Costa Rica veh lai ah thingkung le ramsa tivek a duhnak a hmusuak. Tlangpar ih an va laiah macaw in a hnenah a feh ih cumi a ton mi a hrangah a hnglih thei lo mi thil pakhat a si.

Ramdang tlawnnak ding caan ttha a um. Tlawng colh March 2021 ah Spanish saya Conner McNeely in Costa Rica ah tlawngta pawl a veihnih nak a tlawn pi ding.

Himi a tlawn pi duhnak cu tlawngta pawl ih an thil hmuh daan kauhter nak dingah leh miphun dangdang pawl a hmuh duh ruangah a si.

“Himi khualtlawn nak ih ka tumtahmi cu midang ih umdaan le nunphung dangdang an hmu thei nak ding ah asi,” McNeely in a ti. “Southport le Indiana leng ah thil dangdang hmuh ding a um ti ka hmuh duhnak asi.”

Khual tlawng hi thil mankhung le peisa cem tam mi caangvaihnak asi. Asinain, tlawng thawn khual tlawn a si ah cun peisa mal deuh a cem ding.

“Hmailam ih khual tlawng hnakin tu ih khualtlawng a man hla sawn,” McNeely in a ti. “Rualpi le saya/sayama pawl thawn na tlawng ding ih na nuam aw sawn ding.”

Peisa a mal sawn ding naan, peisa nei tam lo mi pawl hrangah a tam thotho. $3000 tla a si thei. Asinan, peisa ngah daan le khual tlawng nak hrangah peisa mal deuh pek daan a um tiah McNeely in a ti.

March 2021 ih tlawng ding asi naan, McNeely in tu ah tlawngta feh duh dingmi pawl a hawl zo. Tlawngta feh duh tu pawl kha Jones le McNeely biak ding an si.

Phun hleihnih kaitu Tre Morris cu hivek feh dah zo tlawng ta asi ve. A khanpi pawl tla ramdang ih tlawng a duhsak.

“Paris, Switzerland le Germany ah ka feh,” Morris in a ti. “A nuam tak ih mi dang tla feh hai sehla ka duhsak.”