Phun hleihni kaimi Lal Mawia phun nga a ti ah a tlawng ah orchestra zirhtu pawl an rawng ih, awnmawi tum ding tampi a hmuh tikah Mawia in thil dangdang a tum. Asinain, violin a hmuh ah a tum duhmi ngaingai a thei suak. 

“Violin ka tum ah ka tum duhmi ka hmuh nga cule a aw a mawituk” Mawia in a ti. 

Hmaikum phunruk a ti ah Mawia in violin a tum thok. A zumanak ruangah orchestra ih a sangbik sunlawihnak a co. 

Tuikum ah Mawia in Advanced Orchestra ah first-chair dinhmun a nga. Amah hi first-chair comi Laimi hmaisabik asi. 

First chair pawl cu violin tumtu dang pawl bawmtu an si ih cule anmah hi thil thupi an tum. Himi dinhmun thlen ding ah harsatnak a tawng phapha. First chair dinhmun co ding in an sayapa hrangah hla har pakhat ttha tak in a tum ttul. 

“Kan sayapa hrang ih ka tum ah ka thin a phang tak. Kha mi ka tum laiah ka ttih bik,” Mawia in a ti. “Ka hmin first chair ih kiangah ka hmuh ah ka lung awi tak. Himi dinhmun ka nga nak hi ka sunlawih na sa.” 

Himi dinhmun ngatu pawl hrangah sunlawihnak an hmuh thluh ko nan, Mawia hrangah cun a tum deuhmi thil asi. First-chair ngahtu hmaisabik a si ruangah, Mawia in hmailam in violin tumpi Laimi pawl hrangah kaihruaitu asi duh.

“Kawlram ih rawngmi violin tumtu tlawngta pawl hrangah kaihruaitu ttha ka si duh,” Mawi in a ti. “Keima first-chair ka si thei vekin, anmah tla first-chair an si thei ve ti ka hmuh duh.” 

Violin a ti theitawkin thiamding ih a zirlai ah, Mawia in a dang ah harsatnak tla a tawng. Harsatnak a tawn mi pakhat cu midang a duh vekin a biak ngamlo nak asi. 

“Harsatnak ka tawn mi tumbik pakhat cu mi ka biak ngam lo nak asi,” Mawia in a ti. “MI dang thawn pehpar awknak tampi ka nei lo. A saangbik thlen dingah cun mi ka thei ttulu tiah ka rak ruat.”

Himi harsatnak a tawn naan, Mawia cu violin tthazet in tumthei ding ah nasazet in a zuam thotho. A zuamnak in ra ttha a suah ti zumnak a nei.

“Audition hrangah tampi ralrinnak ka nei ih hla in pekmi kha nitin ten zianghman sual lo ding in ka zirh,” Mawia in a ti. “Nitin ten nazi pahnih lo le nazi pathum hrawng violin ka tum dingin ka zuam.”

Orchestra sayapa Thomas Wright in Mawia ih a zuamnak a theipi, a dang tumtu pawl hnakin tla a zuamnak a tam sawn. Himi a zuamnak tatthimnak pahkhat cu Mawia in private lessons a kainak asi. A sayama kha nithum ni tlawngttum hnuah tlawng ah a rawng ih Mawia le tlawngta dang pawl thawn a zirh. 

“Violin tthabik ih a tum theinak ding ah tampi zuamnak a nei,” Wright in a ti. “Violin hi thiam harmi thil pakhat a si ruangah Mawia in khan lengah tla a zir.”

Phun hleikhat kaimi Johnny Lian hi Mawia thawn phunruk an si lai ihsin violin an tum tlang. Lian tla private lessons Mawia thawn a zir. Mawia ih a zuam nasa nak Lian in tla a hmu ve. 

“Violin tumtu pawl lakah a zuam nasa bik. Zirnak khan ah ka hmuh hmuh ringring ih cule a zuam thei tawk in a zuam ringring. ” Lian in a ti.

Himi a zuamnak ziaza hi orchestra khan le violin a tum lawngih a ummi a si lo. A dang khan a nei mi pawl ah tla a zuam tak ve. 

“Tlawngta nuam le thuruat thiam zetmi tlawngta a si,” English sayama Julie Breeden in a ti. “Khan ih a um le thu a ruat ringring, thurelnak kan neih le a ruahmi a rel tam ih cule thu tla in sut. Ka khan ih a rawn asile a tuah ttulmi a tuah ringring ih a ruahmi hi zingzoi dingin a ralring.”

Mawia in hmailam ah violin tum ding tumtahnak a nei. 

“Tlawngsaang ka kai asile composition ka zir ding, college ka kai le tla violin ka tum thotho ding,” Mawia in a ti. “Tlawng ka tteh le tla violin tumnak in hna ka ttuan duh.”