Nov. 8 ah Kawlram a hrilawknak an nei ding. Himi hrilawknak hi Kawlram thuanthu ih a a veithumnak hrilawknak a si ding.

Chin ram ah tla hrilawknak a um ve ding. Himi hrilnak hi Chin State Hluttaw ti ih ko mi a si ih Nov. 8 ah a cang ve ding. Tuilai ih U.S. ram hrilawnak vekin, lam dangdang in neh an zuam nasa.

An dang awk nak cu party pakhat in minung pakhat lawng hril lo in, party in an zuam aw. Tuikum ih party pahnih tumbik lam cu National League for Democracy le Chin National League for Democracy an si.

SHS ih Laimi tlawngta pawl in Kawlram ih thuhla hi an theituk lo. Hrilawknak thu khal theih baan a si lo. Phunhra kaimi Tha Zi in Kawlram thu zir le theih hi a har tiah a zum.

“Himi thuhla pawl hi ka kiangah theih ding in a um dah lo, ” Zi in a ti. “Cumi ruangah zir ding khal paih a um lo.”

Cu lai lak ah U.S. hrilawknak thawn Lairam ih hrilawknak thu cu rel tam mi a si lo. Phunhleikhat kaimi Philip Uk hrang ah cun a tthanlian nak ruangah Lairam ih thuthang hi a theitam tuk lo.

“U.S. ah ka umnak a rei sawn ih cule himi ram ih ah ka tthanlian ruangah ka zir mi cu U.S. thuanthu a si,” Uk in a ti.

Tlawngta pawl cu an mah ten an zirh awk lo ah cun Lairam thuhla theih nak ding zin a um lo. Uk vek in U.S. ram ih kaimi tlawngta pawl cu Kawlram thuhla zianghman an thei lo ziangahtile tlawng ah zirh mi asi lo.

SHS ah A.P. World History zir theih a si, asinain cu mi khan hman Kawlram ih thuanthu tivek le hrilawknak thu an zirh tuk lo.

Science zirhtu Miriam Mawi cu Laimi tlawngta pawl Lairam le Kawlram thuhla le thuanthu zir dingah a duhsak.

“Kawlram ih cangmi thil pawl theih hi a thupi tiah ka zum zaingahtile hitawk ran ih kan um khal ah Kawlram cu kan ram a si thotho,” Mawi in a ti. “Kawlram thu theih a ttha ziangahtile tlawngah pawl kha an upat a sile an bawm thei.”

Kawlram thuhla thei duh pawl hrang ah Mawi in ruahnak a pek.

“Thuthang tampi siar a ttha asinain thuthang hmuahhmuah kha zum ding a si lo,” Mawi in ati.