SHS STARS (Students Tackling Academic Rigor Successfully) pawl cu tuikum tlawng tteh ding pawl lak ih tlawngta ca thiam bik an si. Tuikum ih STARS pawl hi tlawngta 35 an si. Kum dang khal ah himi sung hi a awl me asi lo, GPA 4.0 lo le tam sawn pawl lawng ih tel thei mi a si. 

“A’ hril ngah lawng si lo in, AP le DC khan na lakmi pawl ah tla na thiam ttul,” tiah math saya Jason Adler in a ti. 

Tuikum S.T.A.R.S. lak ih telmi cu phunhleihnih kaimi Lydia Par a si. Phunhleihnih kaimi ih harsatnak lawng tong lo in COVID-19 ruang ah tla thil dang harsatank a tong ve. Par in COVID-19 ruangih harsatnak a ton mi hi a hrang ah tuikum a harsa tiah a ti. 

“COVID le thil dang pawl ruangah tuikum hi ttha lam ih thil hmuh a har zet,” Par in a ti. 

Adler (Par ih a sunloih duhmi saya) in COVID ruangah tuikum ih tlawng kai pawl hrangah ca ttha ten zir le tlawng ih hlawtling hi a har sawn tiah a ruat. Par hrangah tla a harsa ding tia a zum ve. 

“Tlawng a kai hi a thleng thluh ttul,” Adler in a ti. “Par in kum hliekhat sung tlawng a kai daan thleng lo in a kai. Asinain, tuikum cu ca a zir daan le a khan pawl a feh daan  athleng thluh ttul.”

Thil pawl thleng ttulmi a tam ih a tum hmansehla Adler in Par hi a hlawtling nak ding ah a zuam, cule a thil tuah daan a thleng nak ah a hlawngtling vivo tiah a ti. 

“Tlawng ttha ten kai ngah lo ih computer ih kai a har.Curaungah hivek lak ih tlawng ca ttha te ih tuah, hmat ttha ngah, le ca a tikcu ih peh thei pawl cu an ti ttha,” Adler in a ti. 

An theihawknak a rei hrih lo hmansehla, Par in Adler hi tuikum ih hlawtlinnak ding ah  lunglutter mi pakhat a si tiah a ti. Adler lawng si lo in, a rualpi pawl in tla harsatnak a ton caan ah tha an pe ih forhfial nak tla an pe.

“Mi na rinsan theimi pawl lak ih um a ttha tiah ka ruat,” Par in a ti. “Ka rualpi pawl thawn ca kan zoh tlang asile a nuam deuh. Ca zoh tla a awl deuh.”

Tu cu Par in IUPUI ah peisa ziang human ttul lo in a kai ding ih marketing le management a zir ding. S.T.A.R.S. tlawngta a si lai ih thil a zirmi pawl in tlawngsang ih a kai ah a bawm ding tiah a zum.

“Felfai te ih um a thupit zia le thil hi caan nei ih tuah a thupi tiah ka thei zo,” Par in a ti. “Ka ruahdaan ah ka ret zo ih ruangah tlawngsang ka kai ah in bawm ding ka zum. Ziangahtile a har sawn ih ca tuah ding a tam sawn.”

Adler in tla a ca ih a pekawknak le a zuam nak pawl hi tlawngsang a kai le a bawm ding tiah a ruat. Cule tlawngsang hrang ih a timtuah nak ah a bawm ding tiah Adler in tla a ruat. 

“Tu cu tlawngsang ih ca a zir daan ding le a ttuanvoding pawl tla a thei ding ka zum,” Adler in a ti. “Tuikum ih ca zir daan cu amah le phunhleikhat kai pawl hrangah a tthazet in ka hmu.”