Nov. 8, Kawlram ah thimnak a dih khawh in Aung San Suu Kyi, National League for Democracy (NLD) a hruaitu cu thimnak i a ummi hruaitu vialte hna lakah, mipi tam deuh nih an thim. Mah thimnak cu 2011 i an tuahnak in a voikhatnak Kawlram ah an tuah mi asi. Mah thimnak an tuah mi nih cun kum 50 chung ralkhap pawl nih an uknak hna kha a donghter, tiin BBC News ah an tial.

Suu Kyi cu a tu hi kum 70 asi. 1989 in 2010 tiang thonginn chungah a caan a hmang mi asi. Thonginn chung i a tlaknak cu cozah a doh hna ruangah dantatnak an pek mi asi tiin BBC News ah an tial. 1991 ah, Nobel Peace Prize timi laksawng an pek i mah an peknak a ruang cu ralkhap nih an ukmi kawlram hi democracy hmuhnak ding caah thazaang a chuah caah asi.

Mah hremnak an in mi chungah cun, Suu kyi cu hmelchunhnak ah an hman. Kawlram i a ummi vialte cu cozah doh an tih caah, Suu Kyi nih mi vialte a dirkamh hna, Kawlram nih luatnak an hmuh nak ding ah.

“Minung nih luat cu an duh ko le zeitluk sau in hremnak ing ding caah an lungtling hmanhsehlaw, ‘A zaa cang’ an ti ni cu a um te ko lai,” Tiin BBC News ah Suu Kyi nih a chim. “Ruah lo piin thil an tuah bal lomi tiang zong an tuah, a ruang cu minung i chuahkehpimi duhnak nih luatnak leiah khan a mer hna.”

A tu cu NLD, Suu kyi he ruahnak pakhat aa hrawm mi nih 45 tthutnak chungin 43 tthutnak cu NLD nih an ngah, 100% thim khawh a ngah mi chungin 66% cu an hmuh.

Cun November 13 ah , NLD nih cozah a tlaitu inn le kawlram hotu thimnak ding ca i ngah a hau mi tthutnak cu pathum chungin pahnih an ngah.

NLD nih a dang pawl an tei ko hna nain Suu Kyi cu kawlram hotu asi kho lo.

A ruang cu Article 59F i pumrua umtuning ca i an tial mi chungah “an fa le ramdang ah ramchungmi sinak an ngah cang ahcun” hotu an si kho lo tiah an tial. Amah a fa le Kim Aris le Alexander Aris cu ramdang ah a chuak mi an si tiah BBC News ah aa tial.

Suu Kyi hotu asi khawh lo ahcun, a ho nih dah amah caah a tuan piak kun lai?

Amah caah a tuan tu ding cu mi tampi an um ko i, a thimtu nih Nov. 8 ah an chim duh mi poh cu an chim nain a thimtu tak ding cu a dang nih an thim te lai tiah BBC News ah an an tial.

Suu Kyi cu hotu asi kho lo nain cozah cu amah nih a hruai ko hna lai le hotu cu lentecelhnak tunu men lawng zong an si tiah a ti.

“Kan awng i NLD nih cozah an hruai ah cun keimah hi hoatu nakin a sang deuh hmun ah ka um lai. Mah cu a fawimi biacahnak bia asi ko.”

Suu Kyi hruaimi party nih an tei timi thawng an thanh tikah SHS sianghngakchia a tam deuh nih cun an i lawm tuk. Tang hleikhat a kai liomi Elizabeth Sung nih, “ Suu Kyi nih a tei ti mi hi ka lungtling tuk,” tiin a chim.  Zei bia hmanh in aa lawmh nak hi chim a thiam lo.

Sung caah Suu Khi cu le democracy caah “nubik” asi. Suu Kyi cu kawlram democracy hmuhnak ca i a hramthawk tu asi.

Muihnak chung i a ummi ram cu ceunak leiah a thleng tu asi. Suu Kyi nih democracy ram fuh ding caah thil tampi a hlawt cang hna i a tu cu amah nih mah ram thar lei ah cun lut pi  caan asi cang.

“Kan ram i a ummi vialte hna nih hin an nunnak ah an mah le duh ning in i lawm hna seh ti mi le  luatnak timi hi zei asi ti mi hi thei hna seh ti ka duh,” tiin Sung nih a chim. ” Ram thar ah khin tuan ah nuam tein nung hna seh, mah caah cun democracy hi kawlram ah hin tuah zawk hna seh ti ka duh. A ruang cu kan ram mi nih harnak an ing mi a sau tuk cang.”

A dang sianghngakchia, tang hleihnih a kai lio mi Daniel Ling nih cun Suu Kyi hi kawlram caah hruaitu siseh ti a duh. A ruang cu kawlram hi ralkap bu nih an ukmi asi i thil tuah piak an duh paoh ah khua mi vialte kha tuah awkah hram hram in an hnek hna. Suu Kyi hi hoatu asi ah cun kawlram chungah thil tampi aa thleng lai. Ralkap bu nih an uk lio i thil an tuah khawh lo mi pawl hna kha an duh paoh in an tuah khawh lai. Mah cu kawlram mi nih an duh bikmi cu asi.