Khual a tlawnnak ah thil zakhat hlei aa cinken mi chungah, Newcomer program sayamah Marsha Manning nih a nunnak thlenter mi an tam ngai, pakhat cu SHS siangngakchia hna nih ruahchannak le thazang peknak cakuat an tial mi ralzaam mi hna pawl sinah an rel lio mi a si.

“SHS siangngakchia hna nih mi sifak hna sinah an cakuat ah zaangfahnak an ngei mi ka hmuh tikah keimah lungthin thlennak an ka pek ngai,” tiah Manning nih a chim.

Thailand ah phak ding aa ngaih tuk, a ruang cu a siangngakchia hna nih an umnak kong an chimmi hna va hmuh a duh caah a si. Manning le Mt. Pleasant Christian Church (MPCC) bu nih America in Nov. 6, 2015 ah an chuak, Mae Sot, Thailand ah kal ding in.

Vanlawng an zuang nak ah a tha a baa ngai nain Mae Sot an phak tikah a lungthin aa nuam than. An phak tikah, Aung San Suu Kyi thimnak a um caah conglawmhnak tampi a um le Manning cu a hmuhmi vialte nih a lung a lawmter.

Nikhatnak ah, Khrihfa khuate Thailand ah an kal le an mission pastor Joseph Leeja he an i tong. Amah cu Burmese ralzaam hna a khuate ah a ratpi hna le ei le din awk, umnak ding hmun le rian a pek hna. Ralzaam pa hna nih Thai vawlei ngeitu pawl hna caah nikhat ah $3 in rian an tuan. Ralzaam nu hna nih an fa le an zohkhenh hna le lo ah an tuan. Ralzaam hna cu Budis in Khrihfa ah an i thleng tawn. Rangoon Bible Institute (RBI) mino bawmhnak in Manning le a bu nih cun biakinn hram zong an dir.

Manning nih thil phun tampi a hmuh hna, nain a nun a thleng mi thil a tonmi cu hmunthur riaknak hmun ah an kal lio ah a si. Ralzaammi hna cu hmunthur pawngah an um, a si nain an um tuning an i nuam ngai tiah Manning nih a ti. Manning le a bu nih SHS siangngakchia nih cakuat an tial mi kha ralzaam mi hna sinah an rel piak hna.

“An hmaiah an mirh mi le an mit ah an mitthli nih kan riantuanmi bu SHS siangngakchia nih ca an tial mi hna nih an nun a thlen timi a kan theihter,” tiah Manning nih a chim.

Nikhat cu ralzaam riaknak hmun minung 20,000 leng umnak ah an kal i an sianginn ah saya ngan bik hna he an i tong. Mah vialte minung lakah siangngakchia 1,200 lawng an um mi nih Manning a lauter ngai. A nambar a tlawm tuk mi ruang cu tang hra siangngakchia hna cu inn ah rian tuan ding in an um a si lo le ngakchia deuh hna an zohkhenh hna. Pakhat a hmuh mi cu cafung le caku an ngei sihmanhsehlaw, cauk nganmi an ngei lo. Manning a saduhthahmi cu ralzaam mi hna nikhatkhat ah an ram ah an kal than khawh lai ti mi a si.

“Keimah nih an caah luatnak, rian tha, cawnnak ngakchia vialte caah caan tha an hmuh khawhnak hnga, ning caan pek ka duh ngai hna le nikhatkhat cu an ram an sinin an fir mi hna an ngei than khawhnak hnga an caah ruahchannak ka ngei,” tiah Manning nih a chim.

Manning a newcomer siangngakchia hna, Duh Mang le Daniel Sang, nih an sayamah Thailand ah kal in annih refugee an sinak te tlawmpal a thei deuh caah amah cungah an i lawm tuk. Sang nih cun Manning nih khan chungah ca a chimh mi hna a siangngakchia hna he i pehtlaihnak tam deuh a ngei lai tiah a zumh.

Mang nih a uar bik mi cu sayamah si i ma bantuk hmun ah a kal mi kha a si.

“Kei ka uar bik mi cu khi bantuk hnawm pum te hna ah a va kalmi khi sayamah pakhat a si ve nain, i nautat loin le ni sawh loin tein a va kal mi khi ka uar bikmi a si,” tiah Mang nih a chim.

A siangngakchia hna nih an rak ton ve mi a theih deuh caah anmah he pehtlai deuhnak lungthin zong a ngei. Mi tam deuh an zamnak a ruang cu palik le ralkapbu tihnak in a si. A tonmi le hmuhmi thil vialte hna cu a khan ah a cawnpiak tik hna ah a hman khawh mi hna an si lai.

Manning nih a cawnmi cu zunput tha le kihtertu thingkuang hna hi mi nunnak ah a herh lo, Bawipa dawtnak hi minung hna sinah a um ahcun, hmanmi thilri le a dang thil vialte hna hi mi nunnak caah a herh lo a ti.

“Pathin kan sinah a um ahcun a cunglei ka chim mi vialte hna hi, minung lawmhnak a kan pe tu ding caah an herh lo,” tiah Manning nih a chim. “Ralzaam riahnak hmunah ka tonmi vialte hna cu an lung aa lawm ngai le midang a rak kan bawmtu hna sin zongah ka lawm tuk” tial Manning nih a chim.