Twitter ka zoh lai ah, Asian mi tleirawl te in velh a tong lai ka timeline ah a hmu. A veltu pawl in zianghman zaangfahnak nei loin an vel rero. Mi in an bawm tum khale zianghman a ttangkai lo. Comment section ah ka feh in, ka mangbang nak in Asian pawl mi ih hmuhsuamnak an ton tampi ka hmu. Himi an hmuhsuamnak hi ziangdang ruangah a silo, Asian mi an si ruangah a si.

COVID-19 a thok ihsin, USA ah Asian si ruangah thleidannak le hnaihnoknak tong hi a tam deuhdeuh. Texas ah, kumhleikua mi in Laimi pathum a dawt, an suh ah himi rivus hi mi hnen ah an thlen ding ti a zum ruangih a dawh mi asi. Hivek pawl Asian mi pawl ih an ton hi mi ih an zohmen theimi asilo. 

Asian-American ka si vekin, himi hmuhsuamnak pawl ka hmuh asile in thinheng ter ih ka tenzet.  Asian kan si hi kan thleng thei mi asilo cule kan duhhril mi asilo. Mi ih an theih ttul mi cu Asian kan si ruangah COVID-19 kan ngah thei awl cuanglo. 

Kan President in “China virus” tin a kawh tla thil a bawm cuanglo. China ihsin himi natnak a thleng thok ti cu a hman ko. Asinain, “Chinese virus” ti ih kawh cu thil ttha asilo nak a um. A tthat lo nak pakhat cu himi ruangah mi in Asian mi pawl ruangah himi natnak a thleng ti an zum thei. World Health Organization in COVID-19 hi a neitu pawl ihsin ngah theimi asi anti, miphun thawn a pehpar aw lo.

Himi natnak hi Spanish flu thawn an bang aw deuh, himi flu hi mordern history ih natnak ttihnung bik asi. Spanish pawl in an an tuah lo vekin, COVID-19 tla Chinese pawl in an tuah ve lo. Curuangah, Chinese pawl hmuhsuamnak an ton hi theihthiam a har. 

Himi Asian pawl velh an ton tivek hi ttihphanzia asi, asinain mangbang dingmi a um tuk lemlo. Midang hnenah cun mangbangnak asi maithei, asinain Asian hmuhsuamnak an ton hi thil thar asilo. An ton ringring mi asi.

Asian pawl in hmuhsuamnak an ton le mi in thil zaangte le thil thupi tak lo ah an ret tteuh. Mi hrekkhat in hnisuak nak ah an hmuh. Asinain, himi natnak ihsin hmuh ding pakhat cu Asian pawl hmuhsuam an tonnak hi thil thupi ih ret ding ah si ti asi. 

Pulhnak ah thlen lailak ah, minung kan si vekin mi dang le midang kan bawm aw cio ding mi asi, miphun pakhat puhmawh ding asilo. Social distancing ihsin kan khuasa tlang kan bawm ding a thupi sawn. 2020 ah mipkhat miphun pakhat asi ruangah thleidan hi thil mawi, thil duhnung, le thil ttha asilo. Hivek ruahnak neih hi ningzahnak, thil siva, le mi an fim lonak lang tertu a si. Mi hmuahmuah in himi natnak hi kham ding ah kan zuam thluh dingmi asi, Asian mi pawl velh le hnaihnok in zianghman khamnak ding ah a bawm lo.