SHS in sianginn awng a duh mi nih cun ramdang holh cawn a herh. Sianginn ngakchia dihlak nih ramdang holh cawn an herh. Mirang ngakchia lawng si loin, Laimi ngakchia pawl zong nih an cawn a hau ve. Mirang ngakchia nakin Laimi ngakchia caah mah ram dang holh cawn hi a har deuh. A ruang cu, Mirang holh zong an cawn pah a hau. Mirang holh an thiam lo ah cun an saya le sayama le nih ramdang holh an cawnpiak mi hna kha an lung a tling kho lai lo.

SHS ah ramdang holh cawn a ngah mi cu Spanish, French, German le Chinese an si. Rosalind Jackson cu French holh a chimtu asi. Mah French holh chimh cu a ho sin paoh a chim ah a har ngai ko nain Laimi ngakchia pawl a chimhmi hna hi a har deuh, tiin Jackson nih a chim. A ruang cu Laimi ngakchia pawl cu mirang holh zong tha tein an hngal lo le mirang holh in French holh hi ka fianter duh ah hin an lung a tling tuk lo tiin Jackson nih a ti.

“ Keimah ka chimh mi hna chungin, Laimi ngakchia nih hin cheukhat a dang French a cawn ve mi hna nakin French holh cawn hi an i zuam deuh,” tiin Jackson nih a chim. “ An thiam lo zongah, an thiam hlan chung an cawn peng le thiam khawh an i zuam.”

Laimi ngakchia French holh a cawn mi chungin Geneve Cung hi French 5 a cawng lio tu asi. Cung cu tang hleihnih a cawng liomi asi i Laimi ngakchia French holh a cawng mi chungin cun, amah hi a sang bik a cawng mi asi. French a cawnnak a ruang cu Paris ti mi khua, French ah a um mi ah khin khual tlawn a duh caah asi, tiin Cung nih a chim.

French holh a cawn mi hi a caah a har tuk. A ruang cu holhfang pawl khi zoh loin a chim kho hna lo. A dang harnak a ngei mi cu French holh in khaan chungah holh khi asi. French in holh khi a hramthawk ahcun a tih i a holh ngam lo nain holh kaa zuam lo ahcun, ka thiam kho lai lo ti kha a hngal caah a holh thiam lo buin holh aa zuam tawn.

“ Mirang holh nakin French holh hi a har deuh,” tiin Cung nih a chim. “Mirang holh cu kan hawi le he nifa tein kan holh tawn mi asi caah French holh nakin a fawi deuh. French holh cu cauk chungah le kan French saya le sayama te sin lawngah kan cawn mi asi caah French holh cu a har deuh.”

Mah ramdang holh cawn hi mirang holh a thiam lomi hna caah cun a har ngai tiin Cung nih a ti. A har zongah, sianginn awn a duh mi hna caah cun ramdang holh hi an cawn a hau. Mirang an si zongah, Laimi an si zongah, ahopaoh nih cawn a herh mi asi, sianginn awn an duh ahcun.