Underclassmen pawl hnenah thucah

Tial+Par+nih+underclassmen+pawl+hnenah+thucahnak+le+duhsak+nak+thawn+thu+pawl+an+sim+rero+lai+mi+a+si.+Tial+Par+giving+advice+to+underclassmen.+

Fibi Kim

Tial Par nih underclassmen pawl hnenah thucahnak le duhsak nak thawn thu pawl an sim rero lai mi a si. Tial Par giving advice to underclassmen.

Chhan Mawi, Reporter

Phun hleihnih kai rero mi tlawngta nauhak tam sawn cu tlawng ttheh ding an man tuk laiah hrekkhat cu tlawng tthaten rak kai lo ih ca tthaten rak tuah duh lo ruangah harsatnak tong rero tu pawl tla an um. Curuangah hivek harsatnak tuar lo dingin ra laiding mi tlawngta pawl hrangah  phun hleihnih kai rero mi tlawngta hrekkhat nih ruahnak an pek.

SHS ah phun hleihnih kai rero ih National Honor Society (NHS) member a si mi Jacklyn Boyer, Ahbisak Chin, Emma Friar, le Tial Par te cu (phun kua in phun hleihnih tiang) semester pasarih sung GPA 3.5 tlun an ngah ringring ruangah Academic Letter timi an dong. Boyer, Friar, and Par te tla cu 2016 buaih lakding mi lakih cathiam bik mi kul an hril mi ah an tel a si.

Himi phun hleihnih kai rero tu pawl nih hi vek in ca thiambik mi kul lakih tel ve ding in athok pekah cu an timtuah awk lo thu an sim. Asinan, ca an zuam nasa ih a har deuh class pawl tla an lak, betah hmat ttha hmu ding in an zuam vivo ruangah an hlawhtling thu an sim. Curuangah GPA sang duh le cu ca zuam lawng silo in class harsa pawl tla lak ih cumi class pawlah hmat ttha deuh ngah ding in zuam tla a ttul.

Himi tlawngta pawl hi tlawng ca lawng lawng zoh mi an si lo. Tlawng ih cangvaihnak pawl a si mi leknak a phun phun leh Cardinal Cadre, Riley Dance, Key Club, Peers Project, Green Earth, International Club, BACI, le kawhhran cangvaihnak ah tla an tel ve a si.

Hivek in tlawng cangvaihnak le midang bawmnak ih an tel mi nih scholarship ngah ding in a bawm hai thu cu Boyer, Chin le Par nih an sim. Scholarship petu pawl nih tlawngta pawl hi tlawng ca lawng thiam silo in, thil dangdang ah tla thiam le ti thei mi an duh. Scholarship tampi tla cu cathiam le leknak lam thiam ih mi bawm duh tu pawl hrangah an pek mi tampi a um a si.

Boyer le Par cu Butler University ah thiamnak zir zom an tum. Friar cun Purdue University ah kai a tum ih Chin cu Marion University ah a kai tum asi.

Boyer, Chin, Friar, le Par te hivek in hlawhtling ten tlawng an theh theinak cu an thinlung ah ca tuah duhnak an nei ruangah asi.

“Kan mah laimi pawl hrangah phun hleihnih tlawng tluang ten theh theinak ding cun, a hlan ih kan thuanthu, khui in kan ra timi le kan nu le pa hrangah kan ruat a ttul a si,” tiin Par nih a sim. “Nu le pa lung hmui tertu si ka duh ih, mah le pumpak le ka sungkhat unau an hmailamah nunnuam nak pek thei ka duh. Cutin bawm thei dingin hnatuan ttha ttha hmuh ka duh. Himi thinlung ka neih mi nih ca zuam duh nak thin lung in pek.”

Mi dang vek thotho in Emma ih hlawhtlinnak cu zuamnak ruangah a si. Emma cu caa tthaten a tuah, pek ding caan ah a pek hlei ah thu a sut ttheu. Boyer ih a hlawhtlin nak cu zir duhnak thinlung neih hi a si. Boyer nih, “thil pa khatkhat tuah duhnak thinlung na nei ngaingai a sile cu zianghman nih a lo kham thei lo ding,” ti’n a sim.

“Ca cu pung hman ten zuam aw la, Pathian rinsan nak thawn. Khatin na tuah lawng ah ‘Ka theh zo, ka hlawhtling zo asi’ tin na sim thei ding,” tin Chin nih a ti.

Phun hleihnih sinak ihsin, Boyer nih underclassmen pawl cu ca zuam aw ding in thu a cah duh. “Tlawng ca cu har hmanseh la hmailam ih harsatnak le na tluan nak ding hrang ih a lo bawm tu an si ih cumi ruangah zuam sinsin a ttul ih cule zirhtu pawl hmaisong lo tein thu sut ringring uh,” tiin Boyer nih ati.

Underclassmen hrangah thlemnak le ca tuah duh lo nak tampi a um. “A caan caan cu rualpi nih na lamzin fehnak ihsin a lo pial ter thei. Asinain zo kan si ti le kan tumtah mi hi hngilh dah lo ding hi a ttul, “ tiin Par nih a sim.

Emma nih cun, “Underclassmen lai ah cun ca zuam lo le ca tuah paih lo hi a ol tuk. Asinan, cutin a ngah lo. Na hmailam hrangah a lo siatsuah thei. Curuangah, a caan te ah  ca pawl ttha ten ttheh tum in tuah zuam ding a si. Cule ca na theih thiam lo tikah a lo zirhtu pawl kha sut ding ttih hlah. Cu lawng siloin ca har deuh pawl lak ding tla a ttha,” tiin a sim.