Perry Meridian ah sianginn a awng cang mi Mai Tin Par cu Laimi lakah a voikhatnak model a si lo nain, mirang mekazin ah a chuak ta mi hna ah aa tel ve.

Cozah caah rian a tuan Ivy Tech ah sianginn a kai pah in, sayamah si dingah. Model a tuan mi cu caan tawi te ca lawng a si. Tu kum February ah model a si ti aa fiang. Hmailei caah a caan dihlak pekin tuan khawh a duh i a min theihter a duh.

A chungkhar le nih an theih lio ah cun an lau ngai tiah Par nih a chim. A tuah duh mi a si tiin an theih ko nain a tuah lai dingin a ruat ballo. Par caah thazang an pek. A nau nu, Mai Debe Hniang, cu Perry Meridian ah tanghleikhat a kai i a rian tuan mi hi amah a caah cun aa tlak tuk tiin a ruah.

“A hngakchia tein makeup hna le thil a duhnak a chuah tawn,” tiah Hniang nih a chim.

A hawi kom tha bik Nancherry Lungtum cu kum 10 chung a theih cang i thazang a pek ve i lam tha lei ah a nam peng. Mah lam leiin a caah ruahchannak a ngei piak i a caah a thahnem dingmi bia a pek i a lawmpi tuk. Par a duh mi le a nuam mi a tuah kho caah a lawmh pi ve.

“A theih duh mi ka chim lo,” tiah Lungtum nih a chim. “A theih dingmi le a theih hau mi ka chim, a tha tein.”

Mah rian leiin a kal mi hi model dang nih Par a hmanthlak online in a tar, a dang model le agents le company pawl nih an hmuh khawh nak ah. An hmuh khawh in caa le phone in Par cu an chawnh, amah he rian tuan kho ding caah.

Par nih pakhat company nih an chawn tiah a ti, asinain an duh pi mi (contract) a lung tling lo. Mah ruang ah cun a min a thut lo.  A dang agents zong nih kaiter an duh ko nain a tu hi cu amah tein a um. A tha bik mi agent le company a hngah rih ko lai. Amah a duh mi a ngaih khawh mi le hngalhthiam mi a herh cucaah a hngah ko.

Makeup le thil tuah cu a hngakchia lio ah a uar mi a si ko nain rian taktak caah cun a khuakhan mi a si ballo. Par nih nu le unifrom in rian tuan mi pawl le a rian tam a ngeih mi pawl a zoh chun tawn hna. Mah ruang ah cun, an nunning a tlawmpal theih a duh. Cucaah mah a tuah mi hi cu caan a ngei tik lawng ah a tuan mi a si. A caah cun umhar tik ah tuah ding a si.

“A ka batter tuk,” tiah Par nih a chim. “Asinain ka duh mi a si ruangah kaa nuam ve.”

Mi thar ton le hmun dang kal a duh ruang ah a thawk mi a si. A pawng ah lung fek mi le thazang ngei mi pawl he um ti a duh, amah bantuk tein. Pakhat le pakaht i bawmh in i lawmhpi nak caah.

A duh mi rian tuahnak nih donhkhanhnak a chuahpi lo mi lawng tuan a duh, hmailei sayamah si awkah. Hmanthlaktu le agents pawl hna a tuah khawh mi le tuah khawh lo mi pawl a chim peng hna. Mah ruang ah hin, a cheu agents le nih amah he tuan an huam lo. A phung melchuah lo nak caah a fel, tiah a chim. A dang pawl nih a um tu ning le a tuah ding an chimh ah cun, a tuah duh lonak kong a chimh hna.

Angki tawi le tilioh pawl hna cu phun dang an si tiah a ruah. Zei caah cun khuh hau mi a khuh caah. A caah ttih awk pawl hna cu a tuah ngam lo.

Sianginn a kai mi degree hmuhnak hlanah a pakhatnak a chia mi um lo. Sianginn kai in tuah duh mi tuah ve cu a tha ko tiin a ruah. Asinain a sianginn kainak cu a pakhatnak ah chia ding a si tiin a chim.

“Sianginn degree tamter cu i zuam ding a si,” tiah Par nih a chim.

Par nih kum nomi a si lio ah a phun phun in zuam ding le tuah ding a si tiin a chim. Model si an duh zong ah, tuah ding a si, pa pawl hna zong. An khua an ram min langhter awk ah le an miphun lung nuamter awk ah. Thut sawh sawh in um ding a si lo. Caan tha a um lio te ah kal tak ding a si lo tiah a ruah.

A sining tein a kal ko ah cun, a khua lei tlawn khawh in a chungkhar he nichuah hmuh kho a duh.

“Khuanganpi ka uar tuk ko nain ka thinlung ah cun lothlopa fa ka si peng ko lai,” tiah Par nih a chim.